سێ پارك ل ئیدارا سه‌ربه‌خۆیا زاخۆ دێ هێنه‌ چێكرن

ئاژانسا خانی:

جگه‌رخوین تاهر” رێڤه‌به‌رێ گشتییێ وەبەرھێنانێ ل ئیدارا سەربەخۆیا زاخۆ” بۆ ئاژانسا خانی دیار كر: پرۆژێ ده‌ڤه‌را پیشەسازییا زاخۆ دێ هژماره‌كا مه‌زن یا ده‌لیڤێن كاری په‌یدا كه‌ت و ئیكه‌ ژ پڕۆژێن ستراتیژی ل زاخۆ” وی پڕۆژەیی ژ چه‌ندین ئالییان ڤه‌ دێ کاریگەری ل سەر زاخۆ ھەبیت” وه‌كو گه‌شه‌كرنا کەرتێ بازرگانی و پێشخستنا کەرتێ پیشەسازی و کێمكرنا ئینانا كه‌لوپه‌لێن بیانی بۆ ناڤخۆیا ھەرێما کوردستانێ، نەخشێ وی پرۆژه‌یی لدووڤ ستاندەردێن جیھانی هاتییه‌ دیار کرن و ئه‌و دەڤەرە گه‌له‌كا به‌رفره‌هه‌ بۆ کەرتێ پیشەسازی و جهێ 108  کارگەهان تێدا هه‌یه‌ و چه‌ندین پشكێن دیتر ژی دناڤدا هه‌نه‌.

ناڤهاتی گۆت ژی: ئه‌و پرۆژێن وه‌به‌رهێنانێ یێن كو هه‌تاكو نوكه‌ ل زاخۆ هاتینه‌ بجهئینان” شییاینه‌ دو هزار و 310 ده‌لیڤێن كاری په‌یدا بكه‌ن‌ و پرۆژێن وه‌به‌رهێنانێ یێن ل ئیدارا سه‌ربه‌خۆیا زاخۆ 89% ده‌ستێ كاری یێ ناڤخۆیی بوویه‌” دیسان لدووڤ رێنمایێن وه‌زاره‌تا كار و كاروبارێن جڤاكی” دڤێت 75% ده‌ستێ كارێ د پرۆژێن وه‌به‌رهێنانێ دا یێ ناڤخۆیی بیت” هه‌روه‌سا ل ده‌مه‌كێ نێزیك دێ پاركا سیپان ل زاخۆ ل سه‌ر رووبه‌رێ 90 دۆنه‌مێن ئه‌ردی هێته‌ چیكرن ب سه‌ر مایێ 12 ملیۆن دۆلاران” هه‌روه‌سا مه‌ لبه‌ره‌ رێژا كه‌سكاتی ل زاخۆ زێده‌ بكه‌ین” دیسان دێ پاركه‌ك ل بێدارێ ل سه‌ر رووبه‌رێ 320 دۆنه‌مێن ئه‌ردی هێته‌ چێكرن و ل سالا بهێت دێ موله‌تی وه‌رگریت” هه‌روه‌سا پاركا چه‌م سیرمۆیی ژی دێ ل سه‌ر رووبه‌رێ 168 دۆنه‌مێن ئه‌ردی هێته‌ چێكرن و ل سالا بهێت ئه‌و پاركه‌ ژی دێ موله‌تێ وه‌رگریت و بجهئینانا وان پرۆژان دێ بیته‌ ئه‌گه‌رێ هندێ كو پتر گه‌شتییار سه‌ره‌دانا ئیدارا سه‌ربه‌خۆیا زاخۆ بكه‌‌ن.