وەزارەتا بازرگانییا عیراقێ بڕیاردا دەست ب وەرگرتنا 700 هزار تەنێن گەنمێ جووتیارێن هەرێما كوردستانێ بكەت و ڕێڤەبەرێ گشتی یێ بازرگانییا دەخلودانی ل عیراقێ ڕاگەهاند، هەمان ڕۆژا ڕادەستكرنا گەنمی، چەكێ پارێ گەنمی دێ ب جووتیاران هێتەدان.
حەیدەر گەرعاوى ، ڕێڤەبەرێ گشتی یێ بازرگانی یا دەخلودانی ل عیراقێ دیار ژی كر، ئەڤرۆ ڕۆژا پێنجشەمبی دەرگەهێ سایلۆیان ل پارێزگەهێن سلێمانى و هەولێر و دهۆکێ دێ هێنە ڤەكرن و جووتیار دشێن گەنمێن خۆ ڕادەست بكەن، ڕێککەفتن هاتیەكرن كو 700 هزار تەن بهێنە وەرگرتن و سەرۆكوەزیرێن عیراقێ ژی ئیمزا ل سەر وێ ڕێككەفتنێ كریە.
گۆت ژی: گەنمێ سالا بووری یێ هەرێمێ كو هاتیە وەرگرتن 500 هزار تەن بوون و ئەڤسالە گەهشتییە 700 هزار تەنان و ل گەل ڕادەستكرنا گەنمی جووتیار دێ پارێ خۆ وەرگرن لدویڤ جۆرێ گەنمی كو دوو جۆرن، جۆرێ ئێكێ بێ لێبڕین 850 هزار دینار بهایێ ئێك تەنن، ئەوێ دی كو كوالتییا وی پیچەك نزمترە بڕەكا كێم یا پارەی دێ ژێ هێتە بڕین.
