سەرۆك مەسعود بارزانی د بیرەوەرییا 44 سالیا جینۆسایدا كوردێن فەیلی دا، پەیامەك بەلاڤكر.
دەقێ پەیاما سەرۆك بارزانی:
ب ناڤێ خۆدێ مەزن و دلۆڤان
خویشك و برایێن كوردێن فەیلی ل ناڤ دەولەتا عیراقێ گەلەك ئازار و دەربەدەری دیتینە، تاوانا وان ژی بتنێ پشتەڤانیكرنا شوڕەش و بزاڤا ڕزگاریخوازا كوردان بوو. دەركرن و ژێ ستاندنا ناسنامێ ژ سەدان هزار كەسان ژ خویشك و برایێن كوردێن فەیلی و بێسەروشوینكرنا ب هزاران گەنجێن فەیلی ژلایێ ڕژێما پێشتر یا عیراقێ ڤە، تاوان و زۆلمەكا گەلەك مەزن بوو و پشكەك بوو ژ وێ زنجیرا تاوانێن ڕێكخستی یێن كو حكومەتێن ئێك ل دویڤ ئێك یێن عیراقێ بۆ ژناڤبرن و نەهێلانا گەلێ كورد ئەنجامداین.
پێدڤییە حكومەتا فیدڕالی ئەركێ خۆ بۆ ڤەگەڕاندنا مۆلك و مال و ناسنامە و قەرەبووكرن و نەهێلانا ئاسەوارێن جینۆسایكرنا كوردێن فەیلی جێبەجێ بكەت.
ل یادا 44 سالیا جینۆسایدكرنا كوردێن فەیلی سلاڤ بۆ گیانێ پاك یێ شەهیدێن كوردێن فەیلی و هەمی شەهیدێن ڕێیا ئازادییا كوردستانێ دهنێرین. ڕۆل و دلسۆزییا خویشك و برایێن فەیلی بۆ دۆزا نەتەوا خۆ و بزاڤا ڕزگاریخوازا كوردان چ جاران ناهێتە ژبیركرن.
مەسعود بارزانی
4 نیسانا 2024
